Poesie sul Girasole

LE STAGIONI

Si tratta di poesie tratte da “Il girasole”
 
A PINZA
Ai zinque de genaro
anca se tuto costa caro
te tajen sora a toea
parchè te ne vien ‘na volta soea
oh pinza benedetta
fata coi fighi e co tanta ueta !


BEL SOL
Sol bel sol de primavera
tira fora da sta tera
i oceti dea Madona
i soffioni quei che sona
i radici duri e mati
che a mama ciama “frati”
e le viole a tre colori
e po tanti tanti fiori.

Sol bel sol de primavera
tira fora da sta tera
a bisseta indispetiae
e a rana imatonia
a farfaea coi colori
e po’ tanti e tanti fiori

Sol bel sol de primavera
ciama soto la to spiera
i veceti maeatai
i putei scadenai
i poareti e i signori
e po’ ancora tanti fiori.


BISI BORDELONI
Core sora i stechi sechi
i bisi bordeloni.
Oh, sti nostri bisi
dolci e boni !
Ogni giorno i va più alti
el par che i fassa salti.
I va de sbrindolon
e i fa tanta confusion.
El sol li toca
e co te i magna
i se desfa in boca.


VERSO A FINE DE MAIO 
Quando ne manca el corajo 
de vivar
anden verso a fine de majo
drio a grava del Piave.
E gazie ie tute fiorie.
Quel profumo 
el val pì de mie e mie
bozetine
che se vede sue vetrine.
In alto
tra i raspi pendoeoni
vespe e vesponi
i fa i rabaltoni
nell’aria imatonia.
In basso par strazzaria
vioe vioete
oceti dea Madona
coverze sta me tera bona
sta me tera de morti
che sa ancora de orti
de case col cortio
pien de putei.
Soto, i morti 
sta vizin come fradei.

Par darne corajo
Verso a  fine de majo
dae bombe dae tombe
daea grava del Piave
nasse fiori e fiori
de tuti i coeori


PROFUMO DE FEN
Te sento, sì, co te vien,
profumo de fen !
te me riva al’improviso
sui oci, sul viso. 
Te me porta i odori
de tuti i to fiori!


POVERA FARFAEA !
Ò ciapà na farfaea
a jera zaea.
Go dat na streta.
Poareta !
À tremà dixendo “adio!”
E mi l’ò butada sul cortio.
Par tuta chea matina 
me son trovà su e man a porporina.
Oh farfaea d’istà,
scusa se t’ho copà !


CALDO SOFEGON
D’istà, co son vestio da festa,
me fa mal parfin a testa:
a camisa xe serada
a giacheta imbotonada.
Ma co rive a casa mia
tuto quanto buto via:
ciape un capel de paia 
me impire na maia 
braghe de tea
e zocoi coa zinturea.
Pó me destire soto l’ombria
e speto
ch’el caldo vada via.


TORNEREMO A SCUOLA
La scuola la ga verto i so balconi
come na casa che la ga i paroni.
E sti paroni i xe ben zento e otanta
co un viso dolze e bel che tuti incanta.

E qua i leze i scrive ben pulito
e no i paga gnanca un fià de afito.
I paga do scheeti de obbedienza
de bona volontà e de diligenza
ma in cambio i trova amor e alegria
che gnanca un giorno a casa i restaria.


MASANETE DE VALE !
- Masanete bone, done!
- Ma xele proprio bone?	
- Sì, sì, bone da insalata
portè fora la pignata.
Un do chili siora Rosa ?
- E ghe piaxe anca ala tosa
al me Berto  e ai me putei
pesè pur do chili Nanei.
	
E intanto dal sacheto
le vien fora par dispeto
le se gira e se bastona
le se volta e se tampona
le se scontra e se ribalta
e le va co a panza alta.

- Eco un peso ben bondante.
Sì le vendo tute quante!
	
Va la Rosa co a pignata.
Che pignata ! La par mata!
Anca là le se bastona 
le se  gira  e se tampona
le se scontra e se ribalta
e le va co a panza alta.

Oh zoghè bele masanete
tra un’oreta sarè chiete
morte ferme in acqua scura
e a nesun farè paura.
No, ve penso ben conzae
dentro el piato destirae
e mi andar de furegon 
a spunciarle col piron.
Col vin novo e a polentina
fene un pasto da regina.


I DONI DE SAN MARTIN
San Martin
porta zuca porta vin
e patate americane
e castagne grosse e sane.
San Martin
porta el lievaro nel cavin
e le dolze masanete
e le bronze nee cucete
San Martin 
scalda tuti un fiantinin
dane el sol de questa istà.
No scampar par carità !


BROSA
A brosa stamattina
la jera dapartuto
come na siora
sul cadenazo nero del puner
sul marteeto co a testa in  zò
su e do fojete seche del figher
sui stechi dea paeada
sua strada
da par tuto.
A s’à butà co gusto nel me orto
à zà brusà radici e melanzane
ma l’articioco drito
co tute quee giozzete
s’à fato ‘na corona de perlete.


POENTA NOVA
Vien, vien vanti mia regina
vien sentarte sul tajer
cussì lissa tonda e fina
e magnarte l’é un piaser.

Te me piase tenareta
col formaio o col ragù
con i vovi e la panzeta
te me piase ch’é un bisù

Polentina campagnola
che te meto dentro el late
cussì a fete sora a tola
te par tuta a ciocolate !


POENTA E LATE
A Crose ogni sera
s’alza daea tera
l’odor de poenta e late .
El va su in alto
là dove sta el Signor.
Ride el Signor
E sora e case
El manda a so pase.


I ZENOCI DEI PUTEI	
I zenoci dei putei
par tajai coi cortei.
I gà pache nere grose
cicatrici fonde rosse
i ga gnochi busi strissi
macadure sghiribizzi.
Sti zenoci sechi e duri
i se rampega sui muri
i se rodoea par tera
sora l’erba sora a jera.
Mi li lave no i vien neti
I xe sempre un fià sporcheti.


3 MAGGIO  1967
Dove vatu corierona
co quea squadra de putei ?

- Vado a Padova e a Verona
e no spendo gnanca schei.
Po me fermo un fià sul lago
ma la strada mia direta
xe Milano e Bellinzago
là go amizi che me speta.

Bon viagio corierona
cussì piena de putei
te me par na bea parona	
tuta ornada de gioiei.


VIVA I SPOSI !
La porta dea cesa se spalanca
e la sposa bianca in viso		
la vien vanti col piu’ bel soriso.
Ma’l sposo co tanto de guanti
senza imbarazzo
la ciapa  soto brazo
e par quea matina
lu xe el re
e ea la so regina.
Come osei salta fora i putei:
Viva i sposi! – i ziga a vose alta.
Tuta Crose salta fora.
E i putei ancora: -Viva i sposi!
Alora i tosi
tira i confeti da tuti i cantoni.
Che spentoni, che rebaltoni!
Parte la coriera co i sposi davanti
e a Crose
tanti resta senza vose.


BLACK OUT
Chi varia mai pensà
te sta epoca qua nel domie
andar a pie nei giorni de festa ?
Roba da perder a testa.
L’omo che l’à ogni ben de Dio
Invenze de andar vanti
el va indrio .

Bum progresso invenzion
se scalda a casa
fracando el boton 
del termosifon. Benon.
Adess e case diventa giazzere
e se se scalda come foghere
co a forza corente 
i fa la permanente
el pan e vin 
le scarpe el vestitin
ma se a corente se bloca
ne toca pagar patate e late
co carte da mie
e andar a pie
sbassar a cresta 
nei giorni de festa.
Corajo bona zente de Croxe
magnaren poenta e nose
intanto ve mande un bon Nadal
e l’augurio de trovar un chio de sal.
 

Torna alla pagina iniziale di LISA